Riu Mannu

poesia di Carlo Sedda

Beddu lu tempu di pizzinnia
candu da casa z'iscia
senza pinsamenti pa giuggà
lu riu m'aisittaba pa tuffà

L'eba ciara curria a mari
cantendi canzoni a me assai cari
la luna, l'isthelli e lu sori
dazziani beddi curori

Femmini a pedi a mogliu
cun visthiri a cosci a risciarà
linzori, curazzi e pantaroni,
mi fazziani l'occi impampanà

In cascia di riu criscia lu giuru
lu pioppu e li sarizzi piangnendi
la matavella i lu missagliu
l'anghidda era pischendi

Lu pesciu ischatta e lu muzzaru sasthendi
giaddini d'eba s'erani abbagnendi
bisdharori, aironi, curracci e asthri pizzoni
no fazziani astrhru che cantà

Li curori zischendi nidi e obi
rani e tusthoini, roba di magnà
mazzoni in zescha d'agnoni da furà
trimuriggi e gambara escha pa pischà

Oggi lu riu è un muntinaggiu
bruttu e infettu da ischarrigghi di fogni
poschi, peguri e boi so' carrogni
bisogna cun fozza rimidià

Lu tempu passaddu è tuttu un sognu
zischemmu di fa' lesthru a risanà
l'eba debi turrà cantendi a mari
e li giobani d'abà allegri e cuntenti

cumenti chiddi di una vostha possiani
a mogliu i l'eba netta cabuzzà